ඔයාල හැමෝවම පෙම් හසරැල්ලට සාදරයෙන් පිළි ගන්නවා. ආදර අන්දරයක් පාදක කර ගෙන කොටස් වශයෙන් මෙහි පළ වෙන "නිශාන්තයේ හසරැල්ල" කවි සංග්‍රහය මෙන්ම සමාජයීය හා රසවින්දනාත්මකව ලියවුණු සිංහල සහ ඉංග්‍රීසි කවි පද වැල් ද ඔයාලට මෙහිදී කියවන්න ලැබේවි.

කියවන හැමෝටම : කවි කියවලා ඒ ගැන ඔයාලගේ විවෘත අදහස් කියන්නත්, මේ බ්ලොග් එකේ පාඨකයෝ වෙන්නත් අමතක කරන්නෙපා. එයාලට මගේ හද පිරි ස්තූතිය!

April 22, 2015

මිලින වූ මල් යලි පිපේවි ද?


මලක් වී සිටි මෙ මා නුඹ හට
පරව ගොස් ඇත නොගිලිහී තව
දියක් ලැබුන ද යලිත් නැගුමට
මිලින වූ මල් යලි පිපේවි ද?

දොසක් නෑ තව තවත් කියුමට
බසක් නෑ තව වැකුනෙ මා කන
පසක් කරනට දුරස් වූ බව
වසක් ගෙවුන ද නොවේ වැටහුම

යදම් ලා ඇත මෙ මා හද වට
හුදෙකලා වූ ලොවක තද කර
රුවක් නැත තව තවත් මැවුමට
නුඹ ම පමණකි ඉතුරු පැතුමට

April 21, 2015

ජීවිතය

ජීවිතය,
නුඹ නැතිව
තනිකඩව
ඉකි බිඳියි
නිරතුරුව
ජීවිතය...

ජීවිතය,
නුඹෙ සුවඳ
නොදැනීම
වියකිලා
බිම වැටෙයි
ජීවිතය...

ජීවිතය,
නුඹෙ පහස
ගත පුරා
නොගැවසී
නිදි වදින
ජීවිතය...

ජීවිතය,
නුඹෙ වදන්
සවන වෙත
නොවැකී ම
බිහිරි වූ
ජීවිතය...

ජීවිතය,
මගෙන් තොර
අන් පහස
නුඹ විඳින
මා පෙළන
ජීවිතය...

ජීවිතය,
ඉහල ගෙන
පහල ලන
හුස්ම පොද
නුඹට පිදු
ජීවිතය...

April 15, 2015

නොලැබුනත් මට

නොලැබුනත් මට නුඹේ උණුහුම
දුරින් සිට හෝ දකිමි නුඹෙ සැම
දිනක් වේ නම් ලැබෙන සැනසුම
ලංව නුඹ හට කරන්නට පෙම

දුටිමි නුඹෙ රුව කලක් ගතවිද
වෙනස් වී නැත පළමු දින සිට
නුඹෙ නුවන් නා කොපුල් ලවනද
විඳින්නට ස්පර්ෂයෙන් මා අත

අහිංසක ඒ නුවන් යුග පිරි
මුව පොවුන් මෙන් පිරී තිබු සිරි
එ'මේ අත දුව පැනපු නුඹ සරි
සොරා ගත්තා මහද හරි හරි

දොඩන්නට බස් පොරොත්තුව සිටි
පතන්නට සුභ පැතුම් අටියෙනි
පිළිතුරක් ලද සැනින් නුඹගෙනි
දොඩනු වස් මා අවධි වූයෙමි

අතට අත දී වදන් තෙපුලන
දිනක් නුදුරේ උදා වන්නෙද
එතෙක් මා මග බලා සිටිනෙමි
නුඹෙන් වදනක් ලැබෙන තුරු යලි
"නිශාන්තයේ හසරැල්ල" කවි පන්තියෙහි සඳහන් වන පුද්ගලයන් හා ස්ථාන මනඃකල්පිත බවත් නිර්මිත ආදර අන්දරයක් බවත් සලකන්න.

Make it clear that all the characters and the places mentioned in the poetic love story, "Nishanthaye Hasaralla" are fictitious and a creation.