මන්ද ගෙදර වික්‍රම

අත්තිවාරමකි කිසි දින නොබිදෙන්නා
කවුරුත් කියනුයේ මහගෙදරය කියලා
ඉන්නේ එහි සැවොම සුරූපි ලෙස සොඳිනා
බුරුත ගනන් කොටස් තිබෙයි නොබලන්නා

අවුරුදු දෙසීයක්වත් ඇත එහි සිටිනා
වයසක ආච්චී හට මේ වන විටද
නොමැරී ඉන්න රහසක් ගැන දැන ගන්න
කෝල් කරමු සිරසට අපි අද හෙටම

කොටසක් සිටියි අවනඩු හිස උඩින් තියන්
උසාවියෙම නිදියන ගොන් හරක් රැළක්
මගුල් සාරි ඇදගෙන නිදියන පිරිසක්
දැකලා තියෙද මෙය කියවන කිසිම කෙනෙක්

පරම්පරා සියයක් ඇත එක නිවසේ
දන්සල් දෙනු ඇතේ කන්නට මුන්ට අනේ
හලන කිඹුල් කඳුලැලි පිසදන්න අපේ
ගෙවල් වල ගෑනු සැරසී සිටියි මෙහේ

මැරෙන මැරෙන අය යලි යලි නැගිටින්නේ
මූණු වෙනස් කර ගෙන යලි පැමිනෙන්නේ
ලව් කරනා සැම හට බාධක එන්නේ
දෙබස් වලින් ඔබ අප සැම රැවටෙන්නේ

උදේ හවා ගසක් වටේ කැරකෙන්නේ
ලේලිවරුන් ගස නිරතුරු නහවන්නේ
මන්ද ගෙදර ප්‍රෂ්ණ කියා අඩන්නේ
ගහේ දෙවියො සළුව කඩන් දුවන්නේ