කළු ගඟ අද නිසලයි

අම්මේ බඩගිනියි මා නලවන්න අනේ
ප්‍රියයි ඉන්න ඔබෙ තුරුලේ පෙර සේ
දැනෙයි මහට පෙර නැති සිසිලසක් ගතේ
උණුහුම දෙනු මැන ආයෙත් ඔබ තුරුලේ

පාවෙන සේ හැඟුනිය මට පෙර සේ ද
සිටින කල්හි ඔබෙ කුස තුල මෙන් අද ද
නොදනි කිනම් හැඟුමක් දෝ කියා මෙය
නෑසේ කිසි කෙනෙකුගෙ කට හඬ මෙ මට

තාත්තා නැති ද අදවත් පැමිණෙන්නේ
අයියා කෙලෙස මා නැති ගෙයි සැනසෙන්නේ
අම්මා කිම ද අද මා අසබඩ නැත්තේ
තරහා වෙලා කිම අද හැම මා සමගේ

සෙල්ලම් කරපු කාලය මට සිහිවෙනවා
හුරතල් වෙන්න ආසාවක් ඇතිවෙනවා
කාලය හරස් වී ඇති බව වැටහෙනවා
දිළිඳුව උපන්නේ කිම හිත විමසනවා

නිදා ගන්ට යන්නෙමි අම්මේ සැමදා
දක්නට ලැබේ දෝ පවුලේ අය කිසිදා
හැරිය ද පා කර කළු ගං තීරේ සදා
මා කල පෙම නොම දිය වී යයි නිබඳා